Narine's blog / Նարինեի բլոգը

Ծնվել եմ Հայաստանի Հանրապետությունում՝ Վայոց Ձորի մարզում: Մինչև 9 տարեկանս ապրել եմ այդ մարզի Մալիշկա գյուղում: Փոքր տարիքից երգում էի, ու բոլորն էլ համոզված էին, որ երգչուհի եմ դառնալու: Իսկ դրա համար մերոնք գյուղում ապագա չէին տեսնում: 9 տարեկանում ընտանիքիս հետ տեղափոխվեցի Երևան: Դպրոցում ուսանելու տարիներին հաճախում էի նաև Երգի պետական թատրոն: Հետո ընդունվեցի Երևանի Կոմիտասի անվան պետական կոնսերվատորիայի ջազ-վոկալ բաժին, ու հիմա էլ սովորում եմ այնտեղ:

Նպատակներ շատ ունեմ, բայց չեմ ասի մինչև դրանք չիրականանան:) Լսելով ժամանակակից ու արդեն դասական դարձած Ջազզ երգիչներին՝ հասկանում եմ, որ դեռ շատ բան ունեմ սովորելու ու կատարելագործելու, չնայած կարծում եմ այդ գործընթացը երբեք չպետք է դադարի մարդկանց մոտ, հատկապես՝ ստեղծագործողների:

Ավագ սերունդն ասում է, որ Ջազը հոգեվիճակ է, ազատություն… ինձ համար նաև մտածելակերպ է: Ինձ դուր են գալիս ջազային աշխարհայացքով մարդիկ, և ընդհանրապես՝ ՍԻՐՈՒՄ ԵՄ հոգով արվեստագետներին: Չեմ սիրում սուտը և դրանից բխող բոլոր երևույթները: Համոզված եմ՝ ազնվությունը գեղեցկացնում է Մարդուն ու հանգիստ կյանք պարգևում նրան:

Իմ հատկանիշների մասին չեմ սիրում խոսել, քանի որ գուցե բաց թողնեմ որոշ լավ կամ վատ կողմեր: Ավելի լավ է իմ երգերն իմ մասին խոսեն:)